БИШКЕК, 19-дек. — Sputnik. Түркиянын өкмөтү Стамбулдун аэропортунан толтурулбаган 148 европалык паспортту алып бараткан эки кишини кармады. Шектүү жарандар паспортторду пицца жасоочу жабдууга салып алышканын РИА Новости агенттиги Ассошиэйтед Пресс маалымат агенттигине шилтеме кылуу менен билдирди.
Маалыматка ылайык, кармалгандардын бирөө Түркияда төрөлгөн, бирок Бельгиянын жараны. Экинчиси Түркиянын жараны. Кармалган паспорттор француздардын, немистердин, англичандардын жана ирландиялыктардыкы болгон. Алардын жасалма эмес экени айтылууда.
Учурда кармалган жарандар бул паспортторду кандай жол менен алганы жана кандай максатта колдонууга ниет кылганын тергөөчүлөр аныктап жатат.
EC Frontex чек ара агенттигинин маалыматына ылайык, Европа биримдигине келген мигранттардын саны 1,2 миллион кишиге жеткен. Европа комиссиясы мигранттардын мындай агымын Экинчи дүйнөлүк согуштан кийин болгон эң ири жер кортоуу экенин маалымдашты.
