БИШКЕК, 19-дек — Sputnik. Бишкектин жолдоруна кум себүү үчүн таңдан тарта атайын беш автоунаа чыкты деп билдирди Sputnik маалымат агенттигине мэриянын маалымат кызматынан.
Кечээ кечинде кар жаап баштаган, метеорологдор мындай аба ырайы дагы үч күн уланаарын билдиришти.
Көчөлөргө кум негизинен Октябрь районунда себилди. Мэриядан учурда көчөлөр тайгалак эместигин, бирок, саат 15.00терде дагы бир ирет кум сээп чыгышарын айтышты.
Таңдан тарта "Тазалыктын" 90 кызматкери жолдорду, көчөлөрдү 6-7 сантиметр калыңдыкта жааган кардан тазалап чыгышты.
Мэриядан кар тазалоочу атайын автоунаалар кардын калыңдыгы 6-7 сантиметрге жеткенде күрөгөнгө чыгаарын кошумчалашты.
