БИШКЕК, 14-дек. — Sputnik. "Электр станциялары" ишканасынын филиалдарында былтыркыга салыштырмалуу авариялар 50 пайызга азайганын аталган мекеме билдирди.
Маалыматка ылайык, "Электр станциялары" ишканасына Ата-Башы, Күрп-Сай, Камбар-Ата, Токтогул, Таш-Көмүр, Шамалды-Сай, Үч-Коргон ГЭСтери, Бишкек жана Ош ТЭЦтери менен Токтогул суу сактагычы кирет.
Быйыл негизги жабдуунун бузулушу дээрлик катталган эмес.
"Бул калкты электр энергиясы жана жылуулук менен үзгүлтүксүз камсыз кылууга шарт түздү", — деп айтылат билдирүүдө.
Бардык пландаштырылган ремонт иштери аягына чыккан. Мындан тышкары, каржынын жоктугунан токтотулган бардык курулуштар 2015-жылы жанданган. Алардын ичинде Токтогул жана Ат-Башы ГЭСтерин реабилитациялоо каралган. Аталган объектилерди оңдоо иштери кийинки жылы да улантылары белгилүү болду.
