БИШКЕК, 8-дек. — Sputnik. "Кыргызстан — Кытай" темир жол курулушунун долбоорунун техникалык-экономикалык негиздемелери иштелип чыкты. Бул туурасында Транспорт жана коммуникациялар министри Аргынбек Малабаев президент Алмазбек Атамбаевдин кабыл алуусунда болгондо айтты.
Министр андан тышкары мамлекет башчысына транспорттук инфраструктураны өнүктүрүү, анын ичинде келечекте эл аралык транспорттук коридор боло турган, өлкөбүздүн региондору үчүн стратегиялык мааниге ээ болгон автомобиль жолдорун куруу жана реабилитациялоо иштеринин жүрүшү тууралуу маалымат берди.
Атамбаев өлкөнүн транспорттук көз карандысыздыгын камсыз кылууда республикалык жана эл аралык маанидеги транспорттук долбоорлорду өз учурунда жана сапаттуу ишке ашыруунун өзгөчө маанисин белгилеп, жүргүзүлүп жаткан бардык иштерди так көзөмөлдөөнү тапшырды.
