Бишкек, 9-фев. Sputnik. "Кытай-Кыргызстан" эл аралык темир жол курулушу боюнча маселени талкуулоо үчүн Транспорт жана коммуникация министри Калыкбек Султанов жетектеген делегация Пекинге жөнөп кетти. Бул туурасында аталган министрликтин маалымат кызматы билдирди.
Буга чейинки долбоордо Өзбекстан да кошулган, бирок, учурда аталган өлкөнүн катышпай турганы маалым болду. Министр Султанов буга чейин бир катар маалымат каражаттарына "Кытай-Кыргызстан" темир жол долбоорун курууда Өзбекстан каралбай тургандыгын билдирген.
Аталган министрликтин маалымат кызматы өкмөттүк делегация "Кыргызстан – Кытай" темир жолунун курулушу боюнча маселени талкуулоо боюнча Пекинге жөнөп кеткендигин, кошумча маалымат аптанын жума күнүндө болорун билдирди.
Мындан бир ай мурда президент Алмазбек Атамбаев бул долбоорду ишке ашырууга байланыштуу бардык маселелерди терең иштеп чыгып, аларды Кытай Эл Республикасынын тиешелүү ведомстволору менен дагы бир ирет талкуулоо боюнча тапшырма берген.
