БИШКЕК, 7-дек. — Sputnik. УКМК республикада тыюу салынган "Хизб ут-Тахрир" диний экстремисттик уюмунун жигердүү мүчөсүн колго түшүргөнүн аталган мекеме билдирди.
Маалыматка ылайык, кармалган Нарын облусунун 46 жаштагы тургуну Жуматаев буга чейин аталган уюмдун кылмыштуу аракеттерин жүзөгө ашырып, ишмердүүлүгүн улантканы үчүн төрт жылга соттолуп чыккан. Мындан тышкары, ал террористтик топтордун мүчөлөрүнө колдо жасалган жардыруучу түзүлмөлөрдүн курамчаларын алганга жана даярдаганга көмөк көрсөткөн.
Жуматаевдин үйүн тинтүү маалында диний мазмундагы ар түрлүү басылмалар жана электрондук алып жүрүүчүлөр табылып, процессуалдык түрдө алынды. Алынган материалдар тиешелүү экспертизага жөнөтүлдү.
Бул факт боюнча кылмыш жаза кодексинин 241-беренеси боюнча кылмыш иши козголду. Азыркы маалда Жуматаев шектелген адам катары кармалып жана УКМКнын убактылуу кармоочу жайына киргизилди.
Тергөө жүрүп жатат.
