БИШКЕК, 7-дек. — Sputnik. Кыргызстандык тайбоксчу Валентина Шевченко аралаш жоокердик өнөр болгон LegacyFightChampionship 50 ММА чемпиондугу үчүн күрөшүү боюнча келишимге кол койгонун КРдин тайбокс федерациясы билдирди.
Беттеш 2016-жылдын 22-январында Американын Хьюстон шаарында өтүп, ал 5 мүнөттүк 5 раунддан турат.
Шевченко 135 фунт (61,2 килограмм) салмагында күч сынашат. Буга чейин бул титул аталган салмактагы учурдагы чемпион Холли Холмго тиешелүү болуп келген.
Валентинанын атаандашы Келли Фажолс джиу джитсу боюнча АКШнын бир нече жолку чемпиону болуп саналат.
Федерация кыргызстандык спортчу учурда аталган таймаш үчүн даярдыктарын машыктыруучусу Павел Федотовдун жетекчилиги алдында баштаганын белгилейт. Машыгуунун биринчи этабы Индонезиянын Бали аралындагы Денпасар шаарында өтүүдө.
