БИШКЕК, 4-дек. — Sputnik. Премьер-министр Темир Сариев "Манас" эпосунун күнүнө карата манасчыларга энчилүү саат тапшырганын өкмөт башчынын маалымат кызматы билдирди.
Бүгүн, 4-декабрда, Абдылас Малдыбаев атындагы Кыргыз Улуттук академиялык опера жана балет театрында "Манас" эпосунун күнүнө арналган расмий жыйын болуп өттү.
Сариев өз сөзүндө кыргызды улут катары тааныткан үч гана нерсе бардыгын, алар – "Манас", ак калпак жана ар бир кыргыз атуулунун жүрөгүндөгү кыргыз деп соккон сезими экендигин белгиледи.
Жыйында Маданият маалымат жана туризм министри Алтынбек Максутов 2016-жылдан тарта өкмөт башчынын тапшырмасы менен манасчыларга аталган министрликтен он штат бөлүнүп бериле турганын маалымдады.
Мындан тышкары, манасчыларга мамлекеттик деңгээлдеги түрдүү сыйлыктарды ыйгаруу жана акчалай стипендия карап берүү маселеси да козголду.
