БИШКЕК, 4-дек. — Sputnik. Жаш муундарды жоготуп жатканыбызга улуулардын да күнөөсү бар экенин Ош шаары жана Ош облусу боюнча ички иштер башкы башкармалыгынын жетекчиси Сүйүн Өмүрзаков билдирди.
Өмүрзаковдун айтымында, терроризм адамдардын өмүрүнө, эркиндикке жана коомдун демократиялык түзүлүшүнө коркунуч жаратууда. Ал ошондой эле, бүгүнкү күнү Оштун 72 тургуну Сирияга кеткени маалым экенин айтып, алардын 14тү аялдар, 12си жашы жете электер экенин кошумчалады.
"Азгырууларга алданбаш үчүн коңшулары жана туугандары кишиге катуу таасир бере алат", — деди ал.
ИИББдин башчысы баланы тарбиялоого биринчи кезекте үй-бүлө милдеткер экенин кошумчалады.
"Автобуста улууларга орун бербеген жаштарга таң калбай деле калдык. Барын заманга шылтайбыз. Бирок анын чыныгы маңызы кайда жатканын ойлогубуз келбейт", — дейт ал.
Өмүрзаков алдын алуу иштеринде баарлашуу жакшы натыйжа бере турганын кошумчалады.
