БИШКЕК, 4-дек. — Sputnik. Президент Алмазбек Атамбаев алты миллионунчу жаран Айлин Кожошева менен чогуу төрөлгөн дагы 13 ымыркайдын үй-бүлөсүнө материалдык жардам көрсөткөнүн өлкө башчынын маалымат кызматы билдирди.
Буга чейин алты миллионунчу жаранды аныктаган жумушчу топ 25-ноябрдан 26-ноябрга чейин жарыкка келген 122 наристенин тизмесин президенттин аппаратына берген. Бул тизмеден Айлин менен бир убакытта төрөлгөн 10 ымыркай тандалып алынган.
Маалыматка ылайык, 6 уул, 4 кыздын арасында бишкектик, чүйлүк жана таластыктар жок болуп чыккан. Мындан улам 10 ымыркайга аталган аймактардан дагы үч наристе кошулуп, Айлин менен чогуу 14 баланын үй-бүлөсүнө 1 миллион 400 миң сом бөлүнүп берилген.
