БИШКЕК, 3-дек. — Sputnik. АКШнын бийлиги "Ислам мамлекети" (ДАИШ) тарабынан өзүн Россиянын атайын кызматынын агентимин деп атаган кишини мууздап жатканы жөнүндө тартылган видеонун анык экенин тактай элек. Бул тууралуу шаршемби күнү АКШнын мамлекеттик департаментинин расмий өкүлү Марк Тонер билдирди.
"Бул видео тууралуу бизде маалымат бар. Бирок, видеонун анык экенин тактай элекпиз. Эгер ал чындыгында анык болсо – биз бул кадамды сынга алабыз", — деди Тонер.
Буга чейин NBC жана CNN телеканалдары "Ислам мамлекети" тарабынан тартылды деген видеону таратышкан. Анда кызгылт сары кийимчен кишини мууздап жаткан сыяктуу учур тартылган. Садага чабылган киши маалыматтарды Федералдык коопсуздук кызматына (ФСБ) берип жүргөнүн айткан.
2015-жылдын январында "Ислам мамлекети" тобунун согушкерлери россиянын атайын кызматтары менен кызматташып жүрөт делинген эки кишини өлтүрүп жаткан учур тартылган видео таратышкан. Видеону иликтеген эксперттер анын анык экенинен шек санашарын билдирген.
