БИШКЕК, 3-дек. — Sputnik. Баткен районунун Кара-Бак айыл өкмөтүнүн Кызыл-Бел айылынын тургундары жөлөк пул чыккандардын арасынан 150гө чукулун тизмеден чийип салгандыгына нааразы.
Айылдагы келиндер акыркы алты айдан бери пособие берилбей жергиликтүү социалдык кызматкерлер өкмөттүн буйругунун негизинде жөлөк пул алган адамдардын санын азайтып жатат деген маалыматты айтышты.
Кызыл-белдик Гүлчехра Хамзаева пособие алууга документтерин тапшыргандыгына жарым жыл болгондугун, бирок, улам кийинкиге калтырып, соцкызматкерлер тил эмизип келе жаткандыгын айтты.
"Пособие алганга документ тапшырганыма, алты ай болду, улам эмкиде деп, кийинкиге жылдырышат. Салыктардын көлөмүн көбөйтүп, суунун, электр кубатынын баасын көтөрдү. Биздин эле айылда 150 адамдын пособиесин кыскартып салды", — деди нааразы болгон Хамзаева.
Айылдын дагы бир жашоочусу Жылдызхан Эгембердиева алардын кырккан каражатын бийликтин бир катар бутактарынан үнөмдөө керек дейт.
"Мен үчүнчү балама жөлөк пул чыгартканга кагаздарды тапшырып, бир ай алгандан кийин токтотуп коюшту. Күйөөм Мосвкага иштегени барайын десе, кара тизмеге түшүп калыптыр. Жашоо кыйын болуп жатат. Депутаттардын санын, азайтып, ага кеткен каражатты жөлөк пулдарга жумшаса жакшы болот эле. Эл өкүлдөрү жеңилдиктерден баш тартып, парламенттин бюджетин азайтуу менен каражатты жакыр үй-бүлөлөргө берсин", — деди Жылдызхан Эгембердиева.
Баткен райондук социалдык өнүктүрүү башкармалыгынын жетекчиси Нурлан Айыпов жөлөк пулдар чын эле кыскартылгандыгын, бул айыл өкмөтүндөгү түзүлгөн комиссия берген бүтүмүнөн улам жасалгандыгын айтты.
Пособиеге документтерди кабыл алууну айыл өкмөтүнө өткөрүп берилгендиктен, бул сапар да алар кимге каражат чыгары боюнча документтерди топтоп берген.
"Курамында айыл башчысы да кирип, жергиликтүү кеңештин депутаттарынан турган комиссия иштеп, тиешелүү критерийдин негизинде пособие ала тургандарды аныктап чыгат. Буга чеийин 400 бүлө пособие алса, жыл жыйынтыкталганда, кайрадан аларды тактап беришин суранып аталган комиссияга кайрылганбыз. Себеби, мыйзам боюнча киреше ашып кетсе, берилбейт деген мыйзамдар бар. Техникасы барлар, күйөөсү такси айдап иштесе, же мигрант болуп каражаты жеткендер жетиштүү жашаган делип, 100 үй-бүлөнүн документи алынган. Ошондо ал 150 балага жетип калат. Бул маалыматты Кызыл-Бел айылынын комиссиясы иликтеп чыгып берген", — деди Айыпов.
Айыповдун айтымында, пособие алгандардын динамикасы Баткен районунда 41 пайызды түзөт жана бул башка аймактардыкына салыштырмалуу көп көрсөткүч.
Ал эми төрт баланын энеси Хамзаева жөлөк пул алардын бүлөсүндөгү кирешенин негизги булагы экендигин айтты.
