Улуттук банк ноябрда 68,6 млн. доллар сатып беш ирет "жашылбайды" токтотууга аракеттенди

БИШКЕК, 28-ноя. — Sputnik. Ноябрь айында Улуттук банк валюта рыногуна 68 миллион 570 миң АКШ доллары менен беш ирет интервенция жасаганы банктын расмий сайтында жарыяланган.

Биринчи жана эң ири интервенция 6-ноябрь күнү жасалды. Башкы банк рынокко 21 миллион 750 миң доллар алып чыкты. Улуттук банк тарабынан бекитилген доллардын расмий курсу 70 сомдун чегинде болду. Кийинки күнү америкалыктын куну 38 тыйынга кымбаттап кетти.

Кийинки аракет алты күндөн кийин — 12-ноябрь күнү жасалды. Анда Улуттук банк рынокко 14 миллион 200 миң доллра сатып, расмий курсу 70,54 сомду түздү. Эртеси доллардын наркы 40 тыйынга көтөрүлүп, 71,93 тыйынга жетти.

Үчүнчү интервенция доллар 72,86 сомду чапчып турганда жасалды. 24-ноябрь күнү жергиликтүү валюта рыногуна 15 миллион 420 миң доллар чыкты.

Эки күндөн кийинки интервенция доллар 73,44 сомго бааланып жаткан жасалды. 26-ноябрь күнү Улуттук банк тарабынан 16 миллион 600 миң сом сатылган. Бир күндөн кийин "жашылбайдын" куну 70 тыйынга өсүп, 74,15 сомдон соодаланды.

Сомдун курсун турукташтыруу боюнча акыркы аракет ушу жуманын бешинчи күнүндө жасалды. Улуттук банк болгону 600 миң доллар саткан. Ишемби күнү доллардын расмий курсу 75,9 сомдун чегинде болуп, мурунку күнгө караганда 1,75 сомго кымбаттап кетти.

Улуттук банктын жан далбасына карабастан улуттук валютанын долларга карата арзандашы уланууда. 1-ноябрда америкалык валюта 69,70 сом чегинде катталган. Ал эми ай этегинде америкалыктын расмий куну 75,9 сомду түздү.