БИШКЕК, 27-ноя. — Sputnik. Терек, Тереккан жана Перевальное кендерин "Кыргызалтын" ишканасы менен түрк ишкерлеринин биргелешкен "Eti Bakır Tereksay" компаниясы иштете турганын Sputnik агенттигине "Кыргызалтын" билдирди.
Буга чейин кенди иштетүү үчүн жарыяланган сынактык жеңүүчүсү аныкталган. Алтын казууга "Альянс" тоо-кен металлургиялык компаниясы менен "Eti Bakır Tereksay" ишканасы укук талашып келген.
"Натыйжада конкурсту "Eti Bakır Tereksay" биргелешкен ишканасы утуп алды. Жеңүүчү кен иштетүүгө укук берген лицензия үчүн 20 миллион доллар төлөшү керек. Акча 30 күндүн өкмөттүн эсебине түшүшү керек", — деп айтылат билдирүүдө.
Тереккан, Перевальное жана Терек алтын кендери Жалал-Абаддын Чаткал районунда жайгашкан. Терек 1941-жылы, ал эми Тереккан 1934-жылы ачылган. 1950-2001-жылдардын аралыгында аталган кендерди Кадамжай сурма комбинаты иштетип келген. Алтындын запасы Теректе 14,644 тонна, Перевальное кенинде 7,502 тонна, ал эми Терекканда 5,062 тонна экени маалым.
