Мамлекеттик цирктин жатакана имаратынан тургундарды чыгаруу учурунда 11 жашар кыз жабыр тартканын жашоочулар билдирди.
Бейшемби күнү эртең менен сот аткаруучулар Свердлов райондук соттун чечимине ылайык, циркке тиешелүү жатаканадан бир катар үй-бүлөлөрдү чыгарууга ниеттенди.
Жабыркаган кыз тууралуу маалыматты шаардык "тез жардам" кызматы да тастыктады. Алдын ала маалымат боюнча, кыздын мээси чайкалган, ал №3 балдар ооруканасына жаткырылды.
Күбөлөрдүн айтымында, "милиция формасын кийип тургандардын бири жатаканада жашаган кызды башка тээп жиберген".
Бишкек ШИИБ кызматкеринин кызды тепти деген маалыматты четке кагууда.
"Милиция кызматкерлери сот аткаруучулар иштеп жаткан маалда, болгону, коомдук тартипке көз салып турушкан. Алар имараттын ичине кирген эмес", — дейт шаардык ИИБ маалымат кызматы.
Милиция сот аткаруучулар үчүн жол бошотуп берүү милдетин аркалаган.
