БИШКЕК, 26-ноя. — Sputnik. Шаардык милиция цирктин жатаканасында жашаган 10 үй-бүлөнү чыгарууга аракет кылганын Sputnik кабарчысы жеринен билдирди.
Аталган жатакана Шопоков менен Абдырахманов көчөлөрүнүн ортосундагы Жумабек көчөсүндө жайгашкан. Жатаканада 75 бөлмө бар.
Жашоочу Гүлмира Иманкожоеванын айтымында, милиционерлер тургундарды имарат сатылып кеткендиктен чыгарып жатканын айтат.
"Алар подъезддин тосмосун сындырып, эшиктерди талкалап салышты. Оокат-жайыбызды эшикке ыргытып, жашоочуларды кууп чыкканга аракеттеништи", — деди ал.
Иманкожоева айрым тургундар укук коргоо органдарынын кызматкерлерин киргизбөө үчүн буюм-тайымдарын өрттөшкөнүн кошумчалады.
Кыргыз улуттук цирктин директору Курмангазы Исанаев Sputnik маалымат агенттигине аталган имарат цирктин балансындагы конок үйү экенин айтып, ал жактагылар мыйзамсыз жашап жатат дейт. Жогорку соттун 2012-жылдын 23-октябрындагы чечимине ылайык, конок үйдө жашагандар чыгарылышы керек экенин кошумчалады ал.
"Сот акыркы чечимди биздин пайдабызга чыгарып, ал жакта мыйзамсыз жашап жүргөндөр чыгарылсын деген. Аны сот аткаруучулар аткарбай келди. Мына бүгүн келип соттун чечимин аткарып жатат", — деди ал.
Исанаев аталган конок үйдө 56 бөлмө бар экенин, ал жакта циркта иштеген 14 эле үй-бүлө жашарын, калгандары мыйзамсыз турушарын белгиледи.
