БИШКЕК, 26-ноя. — Sputnik. Жыл аягына карата чет өлкөдө жашаган кыргызстандыктардын саны 700 миң адамга жеткенин Мамлекеттик миграция кызматы билдирди.
Маалыматка ылайык, учурда Россияда 520 миң кыргызстандык жүрсө, 75 миңи Казакстанда жашап иштейт. Калганы Европа, АКШ жана Түштүк-Чыгыш Азия менен Жакынкы Чыгыш мамлекеттеринде күн көрүп келет.
"Кыргызстандыктардын басымдуу бөлүгү чет өлкөгө иш издеп кетет. Көбүнесе Россиядан жарандыгын алмаштырат. 1991-жылдан бери 520 миңден ашуун КР жараны Россиянын жарандыгын кабыл алган", — деп айтылат билдирүүдө.
Чет өлкөгө бакыт издеп көбүнчө 18-29 жаш курактагы жаштар (47 пайыз) кетет. Эмгек мигранттарынын орточо айлык акысы 250 доллардан 400гө чейин болуп, орточо мигрант айына Кыргызстанга 170 доллар акча салып турат.
Былтыр мигранттардан 2 миллиард 17 миллион доллар которулса, 2015-жылдын башынан бери 1 миллиард 416 миллион доллар келген. Бул өткөн жылдын ушул маалына салыштырмалуу 31 пайызга төмөн каражат которулганын айгинелейт.
