БИШКЕК, 24-ноя. — Sputnik. 2016-жылы Мамлекеттик каттоо кызматы жарандыгы жок жүргөн жарандардын санын сезилерлик кыскарта турганын аталган кызматтын жетекчиси Тайырбек Сарпашев билдирди.
Анын айтымында, Мамкаттоо кызматы менен Бириккен Улуттар Уюмунун (БУУ) качкындар боюнча иш алып барган башкармалыгы 2014-2015-жылдары Баткен, Ош, Жалал-Абад, Чүй жана Талас облустарынан сегиз миңден ашык кишинин жарандыгы жок экенин аныктаган.
"Алардын төрт миңден ашыгы Кыргызстандын жарандыгына ээ болуп, тийиштүү документтерин алышкан. БУУнун качкындар боюнча иш алып барган башкармалык менен болгон иштер Нарын жана Ысык-Көл облустарында улантылып жатат. 2016-жылы жарандыгы жок кишилердин санын сезилерлик түрдө кыскартууну пландап жатабыз", — деди Сарпашев.
БУУнун качкындар иши боюнча өкүлчүлүгүнүн Кыргызстандагы жетекчиси Маки Шинохара фонд жарандыгы жок кишилерди аныктоодо өкмөткө жардам берүүнү улантышарын айтты.
