БИШКЕК, 25-ноя. — Sputnik. Айыл чарба жана мелиорация министрлиги төө буурчак айдоону пландаштыруу боюнча дыйкандарды окута турганын премьер-министр Темир Сариевдин төрагалыгы алдында өткөн төө буурчакты үзгүлтүксүз сатууга арналган жумушчу жыйында билдирди.
Маалыматка ылайык, быйыл төө буурчак айдаган дыйкандар арзан баадан улам түшүмүн сата албай кыйналышууда. Мындан улам Талас облусунда эки ирет нааразылык акциялары өткөн.
Тышкы иштер министрлигинин маалыматы боюнча, учурда Кыргызстандын бир катар өлкөлөрдөгү элчиликтери жаңы базарды аныктоо боюнча иштерди жүргүзүүдө.
Ал эми Айыл чарба жана мелорация министрлиги төө буурчак айдоону пландоо жана дыйкандарды окутуу иш-чараларын уюштуруу боюнча даярдык көрүп жатканын билдирди.
Премьер-министр Экономика жана өнөр жай, Айыл чарба жана мелиорация министрликтерине төө буурчак өндүрүүчүлөрдүн бирдиктүү ассоциациясын жана реестрин түзүү боюнча иштерди тездетүүнү, Тышкы иштер министрлигине жаңы базарды табуу боюнча иштерди улантууну тапшырды.
