БИШКЕК, 24-ноя. — Sputnik. Казанда өткөн дүйнө чемпионатында кыргызстандык балбандар 13 медалга ээ болду. Бул туурасында Жаштар, дене табия жана спорт боюнча мамлекеттик агенттиктин маалымат кызматы билдирди.
Дүйнөлүк мелдеш – классикалык жана эркин күрөш түрү менен өттү. Чемпионаттын биринчи күнүндө, 22-октябрда таймаш эркин күрөш боюнча болду.
Финалдык таймашта россиялык Ислам Фаляховдон бир аз гана артта калып, 68 кг. салмактагы Бексултан Кубанычбек уулу күмүштү жеңип алды.
90 кг. салмактагы балбандардын ичинен Чыңгыз Чалабаев коло медалга ээ болду. Кыргызстандык курама командасынын капитаны үчүнчү орун үчүн таймашта атаандашы Антон Чуевди "чү" дегенде эле алып түштү.
100 килограммдык категориядагы Кадыр Келсинбеков үчүнчү болду, ал литвалык Каролис Каупасты жеңип алды.
Чемпионаттын экинчи күнүндө, 23-ноябрда класстикалык түрдөгү күрөш өттү.
Мында Кыргызстандын курама командасы сегиз медалга ээ болду. Эң жогорку сыйлыкты эки спортчу — Нагир Сарбашев (+ 76 кг.) жана Нурбек Кожобеков (90 кг. чейин) камсыз кылды. Балбан Бектурган Кожомуратов финалда өзбекстандык Обидали Мавлоновго алдырып коюп, чемпионатта күмүш медаль тагынды. Спортчу кызыбыз Мадина Надирова россиялык Замира Ахмедованы жыга албагандыктан экинчи орунда калды. 58 кг. салмактагы Элиза Абдыкадырова менен 66 кг. салмактагы Назира Арзыбекова (аялдар арасындагы күрөш) жана оор салмактагы Тилек Куралов менен Бекболсун Кушубаков төрт коло медалды жеңип алышты.
Белбоо боюнча бул дүйнө чемпионатына жыйырма өлкө катышты.
