УКМК 5 млн. сом салыктан качкан ишканага кылмыш ишин козгоду

БИШКЕК, 23-ноя. — Sputnik. Ошто салыктын көлөмүн жасалма төмөндөтүп, андан мамлекетке 4 миллион сомдон ашуун зыян келтирген "Көмүр-Юг" ишканасына кылмыш иши козголгонун УКМК билдирди.

Маалыматка ылайык, 2012-жыды Мамлекеттик салык кызматы аталган ишкананы текшерип, 1 миллион 694,5 миң сом өлчөмүндө салык чегерген. Мындай чечимге макул болбогон ишкана сотко кайрылып, Ош облусунун экономикалык иштер боюнча райондор аралык соту салык текшерүү актысын жараксыз деп таап, кайра текшерүүнү дайындаган.

Бирок, МСКнын Ош шаары боюнча башкармалыгынын кызматкерлери ишкананын өкүлдөрү менен көмүскө бүтүм түзүп, кайра текшерүүдө мурда эсептелген салыктын суммасын 1 миллион 589,2 миң сомго төмөндөтүп, болгону 105,3 миң сом сумма эсептеп берген. Мындан улам кайрадан салык текшерүүлөрү демилгеленип, натыйжада ишкана 4 миллион 765,5 миң сом өлчөмүндөгү салыктан баш тартканы белгилүү болгон.

Бул факты боюнча Салык кызматынын Ош шаары боюнча башкармалыгынын кызматкерлерине карата "Кызматтык абалынан кыянаттык менен пайдалануу" беренесине ылайык кылмыш ишин козгоду.

Ал эми аталган ишканага УКМК Кылмыш-жаза кодексинин 213-беренеси ("Чарба жүргүзүүчү субъекттердин кызмат адамдарынын салыктарды жана милдеттүү камсыздандыруу акыларын төлөөдөн четтөөсү") боюнча кылмыш ишин козгоду.

Азыркы маалда тергөө иштери жүрүп жатат.