БИШКЕК, 22-ноя. — Sputnik. Оштон уча тургандар рейстердин кармалышынын кесепетинен улам, отургучта ачка түнөп чыккандыгын, эч ким аларга көңүл бөлүп да койбогондугун Sputnik кабарчысына жүргүнчүлүрдүн бири Кубаныч айтып берди.
Ноокаттык Кубаныч Москвага сапар алган.
"Түндө учушум керек эле. Алгач аба ырайынан улам рейс кармалып жаткандыгын айтышты. Андан бери канча саат өттү, туман деле тарады. Бизге көңүл бөлүп, абалыбызды сураган деле киши болгон жок", — деди жүргүнчү.
Ал учурда аэропортто үч рейс – Самара, Москва жана Новосибирскиге уча тургандар акыйып күтүп жаткандыктарын айтты.
"Мындай жагдайларда авикомпаниялар мейманкана менен камсыз кыла албаса да, эң кур дегенде, тамак-аш, суу берип турушу шарт эле. Күткөндөрдүн баары аэропорттун залында түнөп чыктык ", — деди ал.
Ал эми Ош аэропортунун жетекчилигинен бул боюнча комментарий алууга мүмкүн болбоду.
"Иштегенге жолтоо болбогулачы", — деди Ош аэропортунун начальнигинин орун басары.
Премьер-министр Темир Сариев бүгүнкү өткөргөн шашылыш жыйында, зарыл болгон шарттар менен Ошто конуп жатып кырсыктаган учактын эле эмес, рейстери кармалып күтүп жаткандарды да камсыз кылууну тапшырган.
