БИШКЕК, 21-ноя. — Sputnik. Үстүбүздөгү жылдын июнь айындагы террористтерди кармоо боюнча атайын операциядан жапа чеккен үйлөрдү калыбына келтирүү иштери жакын арада аяктай турганын мэр Кубанычбек Кулматов жабырлануучулардын бири Раззыковдордун үч-бүлөсү менен жолугуу учурунда билдирди.
Үйлөрдү салуу жана оңдоо иштерин Өзгөчө кырдаалдар министрлиги жасап, ага президенттин социалдык коргоо жана калкты колдоо фонду тарабынан беш миллион сом бөлүп берилген.
Мэр Раззыковдорго кошумча компенсациянын көлөмү Темиров көчөсүндө жайгашкан үйгө келтирилген зыяндын көлөмүн экинчи ирет тактоодон кийин аныкталарын айтты. ӨКМ калган калыбына келтирүү иштерин кошумча жумушка түзүлгөн сметага ылайык жүргүзөрү белгилүү болду.
Буга чейин аталган үй-бүлөгө 30 миң сом бөлүнгөн.
