БИШКЕК, 10-окт. — Sputnik. Бишкекте террористтерге каршы жүргүзүлгөн атайы операциянын негизинде жабыркаган беш үйдүн курулушу жана ремонт иштери аяктаганын мэрия билдирди.
Маалыматка ылайык, операция үстүбүздөгү жылдын 16-июлунда болгон. Анда Шооруков жана Темиров көчөлөрүндө жайгашкан беш үй жабыркаган.
Текшерүү учурунда эки үйдө жашоого таптакыр мүмкүн болбой калганын, дагы үч турак жай оңдоого муктаж экени айкын болгон.
Үйлөрдү салуу жана оңдоо иштерин Өзгөчө кырдаалдар министрлиги жасап, ага президенттин социалдык коргоо жана калкты колдоо фонду тарабынан беш миллион сом бөлүп берилген.
Мэрия үйлөр жакын арада өз ээлерине тапшырыла турганын белгилейт.
