БИШКЕК, 20-ноя. — Sputnik. Бишкек мэриясы шаар көчөлөрүндө жүрүүчү коомдук автобустарды алуу боюнча Башкыртстан менен сүйлөшүүлөрдү активдүү жүргүзүп жатканын Sputnik агенттигине вице-мэр Геннадий Милицкий билдирди.
Бейшемби күнү Башкыртстандын вице-премьери Артур Шайнуров видеокөпүрө учурунда республиканын Кыргызстан бийлиги менен Елабуга автомобилдик заводдун автобустары менен Бишкек шаарын камсыздоо боюнча келишим бар экенин белгиледи.
"Долбоор 2016-жылдын I кварталында башталат", — деди ал.
Милицкийдин айтымында, мэрия россиялыктардын Бишкек өнүгүүсүнө кызыкдарлыгы кош колдоп кабыл алынып жатканын билдирди.
"Бирок азырынча кандайдыр бир анык долбоорлор тууралуу айтуу эрте. Башкыр тарап долбоорду ишке ашыруунун башынан аягына чейинки түйшүгүн моюндоого даяр, бирок экономикалык эсеп жүргүзүлө элек. Иштин көзү билинсе, коомчулукту сөзсүз кабардар кылабыз", — деди вице-мэр.
Милицкий мындан тышкары эмдиги жылы Европа реконструкция жана өнүктүрүү банкы тарабынан сатылып алынган жаңы троллейбустар жүрө баштай турганын маалымдады.
"Банк тарабынан 5 миллион евро көлөмүндөгү грант жана 2,7 миллион евро өлчөмүндө кредит бере турган болду. Бул жок эле дегенде 30 жаңы унаа сатып алууга жетет. Долбоорду 2016-жылы жүзөгө ашыруу каралган", — деди ал.
Вице-мэр бул аракеттердин баарын ишке ашыруу үчүн Бишкек шаардык кеңеш депутаттарынын уруксаты зарыл экенин кошумчалады.
