БИШКЕК, 20-ноя. — Sputnik. Жер титирөөдөн жапа чеккен Ош облусунун Кара-Суу жана Алай районунун элине бир нече тоо-кен компаниялары жардам берүүгө даяр экенин Мамлекеттик геология жана минералдык ресурстар агенттиги билдирди.
Үстүбүздөгү жылдын 17-18-ноябрь күндөрү болгон жер титирөөдөн эки райондун 400гө чукул турак жайы жараксыз абалга туш болуп, бир катар үйлөрдөн жарака кеткени маалымдалган. Учурда убактылуу баш паанек үчүн жабыркаган үй-бүлөлөргө боз, үй, чатырлар жеткирилүүдө.
Агенттиктин билдирүүсү боюнча бардык компаниялар жабыркаган элге көмөк көрсөтүүгө даярдыгын билдирген. Мындан улам эртеңден баштап Ош шаарына 40 тонналык контейнер, вагондор жеткирилип, учурда атайы эсепке 800 миң сом которулганы белгилүү болду.
Компаниялар зилзаладан жапа чеккен элге жардам берүүнү уланта турганын билдиришкен.
