БИШКЕК, 18-ноя. — Sputnik. Түркия Чыңгыз Айтматовдун чыгармасынын негизинде "Ак кеме" тасмасын тарта тургандыгы "Ысык-Көлдөн Кара деңизге сапар алган Ак кеме" аттуу эл аралык симпозиумда белгилүү болду.
Үстүбүздөгү жылдын 16-17-ноябрь күндөрү Түркиянын Гиресун шаарында улуу жазуучунун элесине арналган эл аралык илимий конференция болуп өттү. Ага жазуучунун карындашы Роза Айтматова, уулу Аскар Айтматов жана жакын досу Мухтар Шаханов, "Ак кеме" повестинин негизинде тасма тарткан режиссер Болот Шамшиев менен Улуттук илимдер академиясынын вице-президенти Абдылдажан Акматалиев чакырылган.
Симпозиумдун уюштуруучуларынын бири, Гиресун мамлекеттик университетинин деканы Байрам Кайдын айтымында, бул иш-чара Кара деңиздин боюнча тартыла турган "Ак кеменин" алгачкы кадамы болуп эсептелинет.
"Кезинде Чыңгыз Айтматов "Ак кеменин" Түркияда тартылуусуна уруксат берген. 80 жылдыгын өткөргөндөн кийин бул ишке киришмек. Тилекке каршы, үлгүрбөй калды. Бул идеяны биз улуу инсандык осуяты деп кабыл алып, тасма тартууга киришип жатабыз", — деди илимпоз.
Конференциянын жүрүшүндө Айтматовдун өмүрү жана чыгармачылыгы талкууланып, кыргыз, казак, түрк делегациялары өз докладдарын окушту.
