БИШКЕК, 18-ноя. — Sputnik. Мал алып берем деп элдин 900 миң сомго жакын акчасын алдап алып кеткен 60 жаштагы Мырзали аттуу жаран кармалганын Бишкек ШИИБ билдирди.
Иликтөө иштери Ысык-Көл облусунун 59 жаштагы жашоочусунун арызынын негизинде жүргүзүлгөн. Ага ылайык, "малчы" мындан бир жыл мурун мал сатып берем деп аталган жарандын 50 миң сомун алып, ошол боюнча таптырбай кеткен.
Ушундай эле арыз менен дагы беш жаран кайрылып, келтирилген зыяндын көлөмү 869 миң 400 сомду түзгөн.
Шылуун Ленин РИИБ кызматкерлери тарабынан кармалып, учурда тергөө иштери улантылууда.
