БИШКЕК, 17-ноя. — Sputnik. Ысык-Атада 3-класстын кыздарына арам ой менен асылган дене тарбия мугалимине карата психиатриялык экспертиза дайындалганын Чүй облусунун ШИИБ билдирди.
Маалыматка ылайык, үстүбүздөгү жылдын 11-ноябрында Ысык-Ата РИИБне эки кыздын ата-энеси арыз менен кайрылып, 62 жаштагы дене тарбия мугалими сабакта аларга асылганын билдирген.
Учурда окуянын чын-төгүнүн аныктоо үчүн кыздарга карата сот-медициналык жана психологиялык-психиатриялык экспертиза дайындалды. Милициянын билдирүүсү боюнча, психиатриялык экспертизадан мугалим да өтөт.
Аталган окуяны териштирүүнүн жүрүшүн Чүй облусунун ШИИБ жетекчилиги жеке көзөмөлүнө алды.
