БИШКЕК, 17-ноя. — Sputnik. Египеттен Россияны көздөй сапар алган А321 учагын жардырууга тиешеси барлар табылып, сөзсүз жазага тартылат, деди РФ президенти Владимир Путин.
Буга чейин Федералдык коопсуздук кызматынын жетекчиси Александр Бортников А321 учагы ичиндеги колго жасалган жардыруучу түзүлүштүн иштетилишинен улам кыйраганын жар салган.
"Бул террордук акт болгонун так кесе айтууга болот", — деди Бортников Путиндин төрагалыгы менен Кремлде өткөн учактын кыйрашынын себебин аныктоого арналган жыйында.
Президент Синайда россиялык жарандарды өлтүрүү кандуу кылмыштардын эң ириси экенин белгиледи.
"Көз менен жүрөктөн сарыккан жашыбыз кургабай турганы шексиз. Бирок бул кылмышкерлерди таап, жазага тартууга жолтоо болбойт", — деди Путин.
Россиялык жана советтик авиациянын тарыхындагы эң чоң кырсык 7-ноябрь болду. "Когалымавиа" компаниясына караштуу Airbus A321 учагы Шарм-эш-Шейхтен Санкт-Петербургга учуп келе жатып кыйроого учураган. Андагы 217 жүргүнчү жана экипаждын жети мүчөсү – баары курман болгон. Бул окуядан кийин Россия менен бир катар өлкөлөр, анын ичинде Улуу Британия, Египетке учкан каттамдарын убактылуу токтотту.
