БИШКЕК, 16-ноя. — Sputnik. Божомолдоолор боюнча "Ислам мамлекетинин" катыштыгы менен Египетте Россиянын учагы кыйрагандан кийин Улуу Британия коопсуздук чараларын күчөтүү жөнүндө чечим кабыл алды деп билдирет британиялык премьер-министрдин канцеляриясы.
"Россиянын Еипеттеги Metrojet компаниясына караштуу учагы кыйроого учурагандан кийин өкмөт авиа коопсуздук ыкмаларын өзгөртүүнү пландап жатат. Биздин пикирибизде, учак ичиндеги жардыргычтын иштетилишинен улам кыйрады, жана мунун артында "Ислам мамлекети турат", — деп айтылат дүйшөмбүгө караган түнү таратылган билдирүүдө.
Премьер-министр Дэвид Кэмерон дүйнө боюнча аэропорттордо коопсуздук чараларына баа берип чыгууну тапшырды. Авиа коопсуздугу боюнча эксперттер бул ишти эки ай аралыгында жүргүзөт. Премьердин канцеляриясы билдиргендей, биринчи кезекте Жакынкы Чыгыш менен Түндүк Африкадагы аэропорттор текшерилет.
Мурдараак кырсыкты иликтеп жаткан техникалык комиссиядагы россиялык булак кыйроонун себептери жөнүндө эртелеп эле тыянак чыгаруудан карманууга чакырган. Анын айтымында, расмий тергөө аяктаганга чейинки ЖМКларда улам пайда болуп жаткан тыянактар аталган комиссиянын ишине тоскоол болууда. РФ президентинин маалымат катчысы Дмитрий Песков учактын кыйрашынын расмий себептерин азырынча айтуу мүмкүн эмес деп билдирген. Росавиация башчысы Александр Нерадько авиация коомчулугун алдын ала бүтүм чыгарбай турууга чакырган.
