БИШКЕК, 16-ноя. — Sputnik. Электрондук тейлөө кызматы ыңгайлуулугу менен убакытты үнөмдөп, иштин ачык-айкындуулугун камсыздай турганын Мамлекеттик каттоо кызматынын төрагасы Тайырбек Сарпашев Калкты тейлөө борборунуну түндүк филиалын текшерүү учурунда билдирди.
Маалыматка ылайык, жетекчи call-борбор, биометрикалык маалымат чогултуу пунктунун ишин көрүп, документтерди алуу үчүн жарандар тарабынан анкета толтуруу процесси менен таанышты.
Сарпашев электрондук анкеталарды терминалдан толтуруу калктын кезек күтүү убаракерчилигинен арылта турганын белгиледи.
"Мындай тейлөө Каттоо кызматына караштуу бардык мекемелерге киргизилет. Каттоо кызматынын ишмердүүлүгү аркылуу өкмөттүн ишине баа берилет. Жарандар сапаттуу тейлөө менен камсыздалышы керек", — деди төрага.
Сарпашев өз сөзүндө учурда өлкө аймагы боюнча бир катар борборлорду ачуу боюнча аракеттер көрүлүп жатканын кошумчалады.
