БИШКЕК, 10-ноя. — Sputnik. Египет менен россиялык адистер А321 учагында теракт болгонбу деген суроого баарынан жакшы жооп бере алышат жана тергөөнүн натыйжаларын күтө туруу керек деди дүйшөмбү күнү Вашингтондо Британиянын Тышкы иштер министри Филип Хаммонд.
"Синайда Россиянын авилайнери ичиндеги жардыргычтын айынан кыйраган болсо, бул кандай кесепеттерге алып келгенин талкуулаганга биздин мүмкүнчүлүгүбүз боло элек. Биз үчүн кесепеттери кандай болорун гана эмес, Россиянын Сириядагы жана андан сырткаркы процесстерге катышуусуна карата мамилелерибизди да терең карап чыгышыбыз керек", — деди ал Вашингтондо АКШнын мамлекеттик катчысы Жон Керри менен жолугушууда.
Ошону менен катар Хаммонд иликтөөлөрдүн жыйынтыгын күтө турууга чакырды.
"Ал жерде бомба болгон-болбогону сыныктарды эксперттик текшерүүдөн кийин анык болот. Муну биз көзөмөлдөгөн жокпуз. Египеттиктер менен орустар бул суроого жакшыраак жооп бере алат. Биздин чыгарган тыянак-чечимдерибиз колубузда бар маалыматтарга гана негизделген. Алардын кайсы бири ачык болсо, кайсы биир чалгындоолордон алынган", — деди Хаммонд.
Россиялык жана советтик авиациянын тарыхындагы эң чоң кырсык ишемби күнү болду. "Когалымавиа" компаниясына караштуу Airbus A321 учагы Шарм-эш-Шейхтен Санкт-Петербургга учуп келе жатып кыйроого учураган. Андагы 217 жүргүнчү жана экипаждын жети мүчөсү – баары курман болгон. Бул окуядан кийин Россия менен бир катар өлкөлөр, анын ичинде Улуу Британия, Египетке учкан каттамдарын убактылуу токтотту.
