БИШКЕК, 15-ноя. — Sputnik. Кыргызстандык дарыгерлер балдардын өмүрүнө кооптуулук жараткан белгилерди баштапкы стадиясында аныктоо боюнча атайын курстан өтүшкөнүн Саламаттык сактоо министрлиги билдирди.
Маалыматка ылайык, үстүбүздөгү жылдын 9-13-ноябрь күндөрү Кыргыз мамлекеттик медицина институтунун окуу базасында пилоттук дарылоо мекемелеринин 48 кызматкери үчүн эки күндүк семинарлар өттү.
Семинар катышуучулары баланын өмүрүнө кооптуулук жараткан белгилерди алгачкы мезгилде аныктоо жана бейтаптын абалын туура баалоо, дем алуусун камсыздоо, жүрөк токтогондо реанимациялоо, дем алуусу кыйындаган балдар менен иш алып баруу ыкмаларын үйрөнүштү.
Иш-чаранын жыйынтыгында дарыгерлер экзаменден өтүп, алардын ичинен тренингдерди улантуу үчүн инструкторлор тандап алынды.
