БИШКЕК, 14-ноя. — Sputnik. Президент Алмазбек Атамбаев Париж шаарындагы жардыруулардан улам Франциянын президенти Франсуа Олландга көңүл айтуу жолдогонун өлкө башчынын маалымат кызматы билдирди.
Жума күнү кечинде Франциянын борборунда террактылардын сериясы болуп, ал 150гө чукул адамдын өмүрүн алып кетти. Жардыруунун кесепетинен 100дөн ашуун адам жабыркаганы айтылууда. Бардыгы болуп сегиз террорист жок кылынды.
"Кыргызстан терроризмди жектеп, эл аралык коомчулуктун аталган коркунучка каршы аракетин кош колдоп колдоого алат", — деп айтылат президенттин телеграммасында.
Атамбаев каза болгондордун жакындарына көңүл айтып, жабыркагандардын тез аранын ичинде сакайып кетишин каалады.
Учурда Тышкы иштер министрлиги жапа чеккендердин арасында кыргызстандык жарандардын бар-жогун териштирип жатат.
