БИШКЕК, 14-ноя. — Sputnik. Париждеги ири террактыдан 120дан 150гө чейин адам каза болгонун РИА Новости билдирди.
Франциянын борборунда жума күнү кечинде террактылардын сериясы болду. Бардыгы болуп сегиз террорист жок кылынды.
Өлкө жетекчилиги мамлекеттин бардык аймагында өзгөчө кырдаал жарыялап, чек араларды жапты. Көптөгөн чет өлкөлөрдөн Франция элине көңүл айтылып, жардамдар сунушталууда.
Полицияга таянуу менен француз маалымат каражаттары өз-өзүнчө болгон жети кол салуу болгонун белгилейт.
Алгач белгисиз адамдар Париждин 10-округундагы ресторандын биринен ок чыгарган. Андан кийин америкалык рок-группанын концерти өтүп жаткан "Батаклан" театрында 100дөй адам барымтада калып, көрөрмандардын айрым бөлүгү качып чыкканы тууралуу маалымат түшкөн. Күбөлөр кол салгандардын бири "Бул Сирия үчүн!" деп кыйкырганын белгилейт.
Ошол эле учурда бир нече белгисиз адам театрды курчоого алган укук коргоо органдарынын кызматкерлерин аткылай баштады деген кабар келген.
Мындан тышкары, алдын ала маалымат боюнча Фрнация менен Германиянын футбол командалары беттешип жаткан "Стад де Франс" стадионунун жанынан эки же үч гранат жарылганы белгилүү болгон. Стадиондо Франциянын президенти Франсуа Олланддын да бар экени айтылууда.
Андан кийин Сена дарыясынын оң жагындагы Париждин бир катар көчөлөрүндө жайгашкан ресторандар аткылоого туш болгондугу тууралуу маалымат тараган.
Каза болгондор менен жабыркагандардын саны мүнөт сайын өсүп, алгач 25 набыт кеткендер жөнүдө айтылса, кийин француз ЖМКлары 60 адам көз жумганын билдирди.
Париж мэриясы шаардыктарга тез аранын ичинде үйлөрүнө кайтып, эч жакка чыкпоону сунуштады. Көп сандагы өлүмдөн жана жабырлануучулардан улам Париж ооруканалары күчөтүлгөн иш режимине өтүштү.
Парижде жума күнү кечинде болгон бир катар террордук чабуулдарды "Ислам мамлекети" террористтик тобу мойнуна алганын италиялык Sky Tg24 маалымат телеканалы жар салды.
