БИШКЕК, 12-ноя. — Sputnik. Камакта отурган кылмышкерлер мындан бир ай мурун качып чыккан 50-түрмөнүн мурдагы жетекчиси Иманкул Телтаев кармалып, учурда убактылуу кармоо жайына отургузулганын ИИМдеги булактар Sputnik маалымат агенттигине билдирди.
Жаза аткаруу кызматынын маалымат кызматы бул кабарды тастыктады.
“Азыр ал Бишкек шаардык ички иштер башкармалыгынын убактылуу кармоо жайында ЖАМК кызматкерлерин өлтүрүп түрмөдөн качып кеткен кылмышкерлерге байланыштуу кылмыш иши боюнча отурат”,- деди маалымат кызматынан.
21-октябрда ЖАМК төрагасы Алик Мамыркуловдун буйругу менен №50 түрмөнүн жетекчиси Телтаев жумуштан кетип, жеке курамы алмаштырылганын аталган кызмат билдирген. Анын себебин ЖАМКтан “ишиндеги олуттуу кемчиликтер үчүн — тогуз кылмышкердин түрмөдөн качып чыгышына жол бергенинен улам жумуштан бошотулду” деп билдирген.
Качкан кылмышкерлердин бешөө ошол эле түнү кармалып, төртөө из суутканга үлгүргөн. Атайы операциянын натыйжасында алардын экөө жок кылынды. Бирөөсү Эдил Абдырахманов 22-октябрда "Ала-Тоо" айылынан кармалган. Ал эми түрмөгө кайтарылган кылмышкерлердин үчөө ооруканадан үч күндүн ичинде каза болгон. Ошол эле күнү качып жүргөндөрдүн акыркысы Алтынбек Итибаев "Достук" кичи районунда ИИМ жүргүзгөн атайын операция учурунда жок кылынган.
