БИШКЕК, 12-ноя. — Sputnik. Кызматтык милдетин аткарып жатып, сууга чөгүп бара жаткан аялды сактап калам деп курман болгон сержант Тынчтык Абдрахмановдун үй-бүлөсүнө премьер-министр Темир Сариев 100 миң сом бөлдү.
Маалыматка ылайык, өкмөттүн резервдик фондунан бөлүнгөн каражат бүгүн, 12-ноябрда тапшырылды.
Кырсык үстүбүздөгү жылдын 8-ноябрында болгон. Каналга агып бара жаткан аялды куткаруу үчүн сержант Абдрахманов сууга секирип, катуу агымдан улам экөө тең суудан чыга албай калышкан. 26 жаштагы милиционер менен болжол менен ошол эле курактагы аялдын сөөгү Бишкек — Кемин унаа жолунун 59-чакырымында каналдын бүткөн жеринен табылган.
Сууга аккан аялдын аты-жөнү учурда тактала электигин милиция билдирген.
Абдрахмановдун артында жубайы менен эки кызы калды.
