БИШКЕК, 11-ноя. — Sputnik. Азыркы учурга чейин 57 мектептин имараты пайдаланууга берилгени премьер-министр Темир Сариевдин төрагалыгы алдында өткөн мектептерди куруу боюнча жыйында белгилүү болду.
Архитектура, курулуш жана турак-жай коммуналдык чарбасы мамлекеттик агенттигинин маалыматына ылайык, быйылкы жылы өлкө боюнча 71 мектептин курулушун бүткөрүү пландалган.
Азыркы учурга чейин 57 мектептин имараты пайдаланууга берилди. Ноябрь айынын соңуна чейин тогуз, ал эми декабрь айында дагы беш мектеп имараты толук кандуу ишке берилмекчи.
Сариев мектеп имараттарын курууда анын баасын негизсиз түрдө көтөрүү фактыларынын алдын алуу үчүн аны тыкыр текшерип чыгуу зарылдыгын билдирди. Бул боюнча атайын топ түзүп, аны биринчи вице-премьер Аалы Карашев жетектемей болду.
Ошондой эле кийинки жылы "Жер-Үй" кенин иштетүүдөн түшкөн каражатка куруу пландалып жаткан мектептердин долбоорун кайрадан карап чыгуу тапшырмасы берилди.
"Жер-Үй" кенинен түшкөн каражатты 100 мектепти реконструкциялоо жана 100 жаңы мектеп салуу пландаштырылган. Быйыл жыл аягына чейин 26 мектеп толук кандуу оңдоодон өткөрүлүп, калган 74 мектептин ремонту келерки жылы бүткөрүлөт.
Мындан сырткары, быйыл 21 социалдык объект курулуп, пайдаланууга берилүүдө.
