БИШКЕК, 10-ноя. — Sputnik. Өкмөт башчы Темир Сариев Талас облусу үчүн эң негизги маселе – төө буурчактын баасы экенин белгилеп, бул жаатта дыйкандар менен биргеликте аракет көрүү зарылдыгын билдирди. Бул тууралуу өкмөттүн маалымат кызматы билдирди.
Сариев төө буурчак маселеси боюнча түшүндүрүү иштери абдан начар деңгээлде болуп, маалымат жетишпегени үчүн аталган маселе экономикалык маселеден саясий маселеге айланып жатканын кошумчалады. Бул жаатта төө буурчак айдаган дыйкандар ассоциациясын түзүп, биргелешип иш алып баруусу зарыл экенин белгиледи.
"Биздин астыбызда абдан чоң милдеттер турат. Дүйнөлүк кризисти эске алуу менен өз абалыбызга жараша кыска убакыттын ичинде өзгөрүүлөрдү ишке ашыруу керек. Бизде убакыт жок. Өкмөттүн облустагы өкүлчүлүгү, акимдер өтө ыкчам аракет көрүп, иреттүү тартип болушу керек. Ар ким өз милдетин кынтыксыз аткарууга тийиш. Бизге учурда туруктуулук, тартип, мыйзамдуулук жана өнүгүү керек", – деди Темир Сариев.
Премьер-министр жер-жерлерде жаңы ишканаларды ачуу, айыл чарба тармагында жаңы ыкмаларды жайылтуу, ар бир облус борборуна логистикалык борборлорду жана мал союучу жайларды куруу, ишкерлерди колдоо боюнча иштерди күчөтүү зарылдыгын билдирди.
