БИШКЕК, 10-ноя. — Sputnik. Токмок шаардык ички иштер бөлүмүнүн кызматкери милициянын кичи сержанты Тынчтык Абдрахманов сууга агып бараткан аялды куткарам деп жатып каза болгонун Чүй облустук ИИББдин маалымат кызматы билдирди.
Маалыматка ылайык, 8-ноябрда болжол менен саат 16.45те Токмок ШИИБине шаардык түндүк тарабындагы каналга аял агып баратканы тууралуу кабар келген. Окуя болгон жерге ыкчам иликтөө тобу менен тез жардам кызматы жөнөтүлгөн. Каналдагы сууга агып бараткан аялга жардам берүү үчүн милициянын кичи сержанты Тынчтык Абдрахманов сууга секирген. Бирок, суунун агымы абдан катуу болгондуктан алар өз алдынча жээкке сүзүп чыга алышпай, агып кеткен.
Алардын сөөгү Бишкек – Кемин автожолунун 59-чакырымынан табылган. Каза болгон аял болжол менен 25-30 жаштарда экени айтылууда.
ТынчтыкбекАбдрахманов 1989-жылы туулган. Эки баланын атасы. Ички иштер органдарында 2013-жылдан тарта иштеп баштаган.
