БИШКЕК, 10-ноя. — Sputnik. Кытайдан Кыргызстандын аймагына өтүп кеткен алты топозду чек арачылар ээсине кайтарып беришкенин Мамлекеттик чек ара кызматы билдирди.
Маалыматка ылайык, үстүбүздөгү жылдын 7-ноябрында Оштун "Кызыл-Жар" чек ара заставасынан 4-5 чакырым алыстыктагы Талгый ашуусунун жанында оттоп жүргөн алты топозду аныкташкан.
Ошол эле күнү кыргыз-кытай чек арачылары жолугуп, сүйлөшүүлөрдү жүргүзүшкөн. Эки күндөн кийин Түз-Ашуудан кыргызстандык чек арачылар кытайлык кесиптештерине топоздорду кайтарып беришкен.
