БИШКЕК, 16-сен. — Sputnik. Чоң-Алай аймагындагы кыргыз-кытай чек арасына жакын жерде жайылып жүрүп, Кыргызстанга өтүп кеткен топоздор кайра кайтарылды. Бул туурасында Мамлекеттик чек ара кызматынын маалымат кызматы билдирди.
"Ош облусунда эки өлкөнүн чек арачылары чогулуп, кытайлык кесиптештерине кыргыз чек арачылары 19 баш топозду кайтарып берди", — деп айтылат аталган ведомствонун тараткан маалыматында.
15-сентябрда Ош чек ара отрядынын "Эркечтам" чек ара тозотунун жоокерлери Тагачар ашуусунда жайылып жүргөн топоздорду тапкан. Алар жайлоодо оттоп жүрүп, Кыргызстандын аймагына өтүп кеткендиги маалым болгон.
Ошол күнү кечинде кыргыз чек арачылары кытайлык кесиптештерине ири мүйүздүү малды тобу менен өткөрүп берген.
