БИШКЕК, 6-ноя. — Sputnik. Журналисттик калем курч, ошондой эле адилеттүү болгону чоң мааниге ээ, деди президент Алмазбек Атамбаев Кыргызстандын массалык маалымат каражаттарын куттуктап жатып.
Президенттин айтымында, пресса күн сайын калкты акыркы жаңылыктар менен кабардар кылып, окуянын чок ортосунда жүрөт. Ошол эле учурда журналисттер коомдук пикирди чагылдыруучу аянтча болуп, эл менен бийликтин ортосундагы көпүрөлүк милдетти аткарат. Өлкө башчы акыркы жылдары Кыргызстан өзгөрүп, жарандар күч-кубаттуу, ишенимдүү боло башташына журналисттердин салымы чоң экенин белгиледи.
"Бул үчүн биз сиздерге ыраазыбыз. Өзүнүн ишин татыктуу алып барып, ага коюлган чоң милдетти — сөз алдындагы, коомчулук алдындагы, өз абийири алдындагы жоопкерчиликти сезе билген чеберлер менен сыймыктанабыз", — деп айтылат куттуктоодо.
Өлкө башчынын айтымында, күчтүү, жагымдуу сөз адамдардын башын бириктирип, жакшылыктын үмүтүн тартуулайт. Бирок ал кыйратуучу да касиетке ээ. Андыктан, журналисттик калем курч, ошол эле убакта адилеттүү болгону чоң мааниге ээ.
Президент маалымат каражаттарынын өкүлдөрүнө чыгармачылык ийгилик жана кесипкөйлүк каалады.
