БИШКЕК, 6-ноя. — Sputnik. Ноокат районунда мектеп менен май куюучу жайды талап-тоноп кеткен жарандар кармалганын ИИМ билдирди.
Маалыматка ылайык, 5-ноябрга караган түнү үч кылмышкер мектепке кирип, эки компьютер, принтер, ксерокс жана башка бир катар буюмдарды алып кетишкен.
Уурдалгандарды унаага жүктөп жолго чыккандан кийин машинанын майы түгөнүп, каракчылар Көк-Бел айылында жайгашкан май куюучу жайга келишкен.
"Саат түнкү экиде станцияга келишкен. Эшик ачылгандан кийин ичине жулунуп кирип, бычак менен коркутуп, акча талап кылышкан. Ал күнү станцияда жаш бала калганы аныкталган", — деп айтылат билдирүүдө.
Кассадагы үч миң сомду алгандан кийин машинага толтура май куюп, кылмышкерлер из жашырып кетишкен.
Мектептен уурдалган техника Кара-Суу районунан табылды. Принтер күрөөгө коюлганы анык болду. Учурда кармалгандар убактылуу кармоочу жайга киргизилип, тергөө иштери жүрүп жатат.
