БИШКЕК, 6-ноя. — Sputnik. Англиянын борбору Лондондо кыргыз жазуучусу Казат Акматовду эскерүү кечеси өтүп жатканын Тышкы иштер министрлиги билдирди.
Маалыматка ылайык, учурда IV Эл аралык китеп форуму жана "Ачык Евразия жана Борбордук Азия — 2015" адабий фестивалы өтүп жатат.
Кыргыз жазуучусун эскерүү кечеси Юнус Эмре атындагы түрк маданий борборунда өтүп, Акматовдун бир катар улуттук жана эл аралык сыйлыктарга татыган "Архат" романынын бет ачары болот.
Мындан тышкары, фестивалдын алкагында дагы бир кыргыз жазуучусу Султан Раевдин 2014-жылдын мыкты романы аталган "Жаза" чыгармасы тартууланат.
4-ноябрда башталган адабий иш-чара британиялык коомчулукту Борбордук Азия жазуучуларынын чыгармалары менен тааныштырууну көздөп, 6-ноябрга чейин уланмакчы.
Алгачкы Эл аралык китеп форуму жана "Ачык Евразия жана Борбордук Азия" адабий фестивалы 2012-жылы Бишкекте өткөрүлгөн.
