БИШКЕК, 4-ноя. — Sputnik. Такси айдоочусун ур-токмокко алып, болгон акчасын алып кеткен каракчылар кармалганын Бишкек ШИИБ билдирди.
Маалыматка ылайык, Ахунбаев жана Шабдан баатыр көчөлөрүнүн кесилишинде кардар күтүп отурган такси айдоочусуна эки жаран келип, Токомбаев көчөсүнө жеткирип коюусун суранышкан. Машина отургандан кийин айдоочуну кекетип-мокотуп, ур-токмокко алып, акча талап кылышкан. Каршылык көрсөткөндө бирөөсү колундагы бөтөлкөсүн сындырып, мууздап салам деп коркуткан. Андан кийин айдоочунун үч миң сомун алып, из жашырып кетишкен.
26 жаштагы жабырлануучу милицияга арыз менен кайрылып, анан негизинде Чүй облусунун 21 жаштагы жана Бишкек шаарынын 22 жаштагы тургундары кармалды.
Учурда алар убактылуу кармоочу жайга киргизилип, кийинки тергөө иштери жүрүп жатат.
