БИШКЕК, 4-ноя. — Sputnik. Ош шаарынын мэри Айтмамат Кадырбаев "Жылуулук менен камсыз кылуу " ишканасы менен ТЭЦтин иштешин текшерди. Ага жылуулук менен камсыздоочу жайларга көмүр керектүү көлөмдө топтолгондугун айтышты.
Учурда калаадагы жылуулук менен камсыз кыла турган жайлар кышка даяр.
Ош ТЭЦинин директору Анарбека Аттокуровдун айтымында, бүгүнкү күндө отун менен толук камсыз болушкан, учурда 16, 44 миң тонна мазут даярдалган. Бардык кварталдык жана магистралдык жылуулук тармактары оңдоп-түзөөдөн өтүп, ишке даяр.
"Кышка даярбыз. Биринчи иретте жылуулук социалдык объектилерге берилет. Беш бригада эл жашаган кварталдардагы үйлөргө жылуулук берүүгө даяр турат ", — деди Аттокуров.
"Жылуулук менен камсыздоо " ишканасындагы 60 от казандын бардыгы учурда ишке берилүүгө даяр. Алардын 17си электр кубаты, 43ү көмүр менен иштейт. Ал жерген көмүр керектүү делген 3100 тонна көлөмдө топтолгон.
