БИШКЕК, 27-окт. — Sputnik. Кыргыз-кытай чек арачылары эки өлкөнүн аэропортторундагы көзөмөл боюнча маалымат алмашып, ар дайым байланышта болот. Бул тууралуу эки мамлекеттин чек арачыларынын Кыргызстанда болгон жолугушуусу учурунда белгилүү болду.
Мамлекеттик чек ара кызматынын маалыматы боюнча жолугушууда 2014-жылы Үрүмчү шаарында кызматташуу боюнча кол коюлган келишимдердин аткарылышы талкууланды.
Мындан тышкары, Кыргызстан менен Кытайдын аэропортторундагы өткөрүү пункттарынын көзөмөлдү күчөтүү максатында биргелешкен операцияларды жүргүзүү маселеси каралды. Жолугушуу учурунда тажрыйба алмашууга жана кадр даярдоого өзгөчө басым жасалган.
Иш-чаранын соңунда ыкчам-иликтөө жаатында биргелешкен аракеттерди көрүү жана үзгүлтүксүз байланышта болуу боюнча бир пикирге келишти.
