Кылмышкер жок кылынган "Достук" кичи районунда тазалоо жана ремонт иштери жүрөт

© Sputnik / Каныбек БейшенбековАтайы операция жүргөн үйдүн эшиги.
Атайы операция жүргөн үйдүн эшиги. - Sputnik Кыргызстан
Жазылуу
Өкмөт башчысы Сариев шаар мэри Кулматовго окуя болгон жерге барып, "Достук" кичи районунун тургундарын газ, свет жана суу менен камсыз кылуу боюнча иштерди уюштурууну тапшырды.

БИШКЕК, 23-окт. — Sputnik. Кылмышкер Алтынбек Итибаевди жок кылуу операциясынын натыйжасында үй-жайсыз калган киши болгон эмес, анткени үйдөгү батирлердин көпчүлүгү ижарага берилчү. Бул тууралуу операциянын кесепеттерин жоюуга арналган шашылыш жыйында белгилүү болду. 

Өкмөттүн маалымат кызматы билдиргендей, жыйын бүгүн, 23-октябрь күнү премьер-министр Темир Сариевдин жетекчилиги алдында өттү. 

Өкмөт башчысы Бишкектин мэри Кубанычбек Кулматовго окуя болгон жерге барып, "Достук" кичи районунун тургундарын газ, свет жана суу менен камсыз кылуу боюнча иштерди уюштурууну тапшырды.

"Тез аранын ичинде атайын операция учурунда жабыркаган үч кабат үйгө келтирилген зыяндын өлчөмүн аныктоо зарыл. Мындан тышкары, оңдоо жана калыбына келтирүү иштери жүргүзүлүшү керек", — деди Сариев.

Курман болгон жоокер Исмаилов менен коштошуудагы аза кайгысы
Өкмөт аппаратынын жергиликтүү өз алдынча башкаруу жана уюштуруу-инспектордук иш бөлүмүнүн алдын ала маалыматы боюнча атайын операциянын натыйжасында үй-жайсыз калган киши болгон эмес, анткени үйдөгү батирлердин көпчүлүгү ижарага берилип келген. 

Жыйын жүрүшүндө Сариев өкмөттүн Нарын облусундагы өкүлү Аманбай Кайыповго атышуу учурунда каза болгон жай тургундардын сөөгүн жерге берүү боюнча иш-аракеттер тапшырылды.

Кечээ, 22-октбярь күнү түнкү саат 22.30да "Достук" кичирайонунда жашырынып жаткан Итибаев жок кылынган. Үч саатка созулган атайын операциянын натыйжасында милициянын капитаны 37 жаштагы Төлөбек Исмаилов менен бирге 79 жаштагы Батыш Койчуманова жана анын күйөө баласы 56 жаштагы Медет Какеев каза болгон. Кемпир Нарындын Ак-Талаа районунан болсо, Какеев Кочкор районунун жашоочусу болгон.

Буга чейин каза болгон жай тургундардын үй-бүлөлөрүнө президент тарабынан 300 миң сом, ал эми өкмөттөн 50 миң сом материалдык жардам көрсөтүлөрү белгилүү болгон.

Жаңылыктар түрмөгү
0